【名家搶先睇】危機醞釀待爆鑊（EL.）建立時間: 1214 20:45

美國本周極有可能揭開2006年以來首次加息嘅序幕，大家成日認住加息後股市會跌，不過筆者發覺，美國加息周期展開，同埋恒指見頂回落嘅時間，兩者其實冇乜直接關係，恒指大跌反而同大規模嘅股市或經濟危機爆發有關。

翻查呢二十年來嘅往績，恒指總共見過3次頂，分別喺1997年、2000年同2007年。

美國1997年3月展開加息周期，不過呢次加息周期夾埋得一次加息咁大把，儲局嗰次加息之後就維持息率不變一年半，1998年9月再轉為減息。至於恒指當年加息後嘅反應就係繼續升，去到1997年8月因為亞洲金融風暴發生，恒指亦都見頂回落。

至於2000年3月嗰次恒指見頂，就係美國喺加息周期開展一年多後先至出現，美國1999年6月開始加息周期，加到第五次就引爆咗個科網泡沫，連帶恒指同美股嘅升勢都化為灰燼。

2007嘅一次恒指見頂相信大家仲記得好清楚，就喺拜港股直通車食詐糊所致，但當年美國已經因次按危機爆緊鑊而處於減息周期，所以呢次恒指見頂亦同美國加息冇乜關係。而金融海嘯亦喺恒指見頂後大約一年發生，恒指要到2009年先反彈。

如果上述三次恒指見頂嘅歷史係會重演，大家要擔心嘅已經唔止係美國加息後恒指會點走咁簡單，而係要認真諗吓恒指係咪真係喺今年4月見咗頂，而如果答案係「YES」，咁又係咪意味住有個大型危機已經醞釀緊並有待爆發呢？咁究竟又會係關中國經濟、美國高息債，定係新興市場事呢？